Kum 1947 hma zawnga Hebrai Bible kuta ziah hmuhchhuah awm chhun kha chu papyrus hnaha an ziah keh them thenkhat te, Pathian Thu Sawm Pek leh Deuteronomy 6:4, 5 thu keng telte kha a ni a. Heng lehkha pawimawhte hi ‘Nash Papyrus’ tia hriat niin, B.C 100 hunlai vela mi nia hriat a ni.
Kum 1947 a lo inherchhuah chuan Bible thu kuta ziah hmuh chhuah tawh zinga pawimawh ber chu Bedonuins (Arab hnam hmun nghet nei lova vak vel chi) thenkhatte chuan savun lehkha zial tam tak leh a thler themte chu tuipui thi (Dead Sea) vaukam hmar-thlang lamah pukah chuan an hmuchhuak a. Chung lehkha zial tam takte chu la hmuhchhuah miah loh an nih avangin a hmu tute chuan tihral dan mai an hrelo a. Lei tura an biakte lah chuan a lem siam chawp a nih ringin an hnawl zel a. A tawpah chuan lehkha zial thenkhatte chu Hebrew University ami Prof.E.L.Sukenik kutah awmin, a dang chu Jerusalem a Syrian puithiam ho awm naah lak a ni ta a. Khatih hunlaia Jerusalem a innghat, American School of Oriental Research director Dr. John C. Trever chu chung thil hlui chu engnge a nih tih hrechiang hmasa bertu niin, America rama mithiamte ngaihven a hlawh tran ta a ni.
Kum 1948 nipui a lo inherchhuah a, khawthlang ram ten Dead Sea scrolls hmuhchhuah a ni tih an hriatin, an suangtuahna leh rilru a luah khat zova. Khatiang taka Christian leh Juda ten hmanlai thil (archaeology) an hmuhchuah tawhte zinga ngaihven hlawh nasa kha a la awm ngai lo. A hma kum 25 kal taa Aigupa lal Tutankhamen-a thlan la chhe miah loa an hmuhchhuah tih loh kha chu thil hlui hmuhchhauh lama an tawp rih vangte pawh a ni mahna.
Judai ram thlaler ro tak mai chuan chung savun lehkha-zial te chu a vawng tha thei ani tih hriatna chu phurna leh chona thar nena a dawng zawn lehna a rawn hring chhuak thuai bawk a. Puk leh lehkha-zial tam tak, a kehthem sang tam takte nen chuan hmuhchhauh leh a ni ta zel a.
Qumran hmun, puk leh lehkha-zial hmasa ber an hmuhchhuah naah khan kuta ziak lehkha zial 11 lai hmuhchhuah niin. Bedouins leh hma sang thil zir mite (Archaeologist) te hmuhchhauh a ni. Hengte hi Qumran lehkha zial (Qumran scrolls) vuah niin, Dead Sea scrolls chuan Dead Sea bul hnai, Judai ram thlalera an hmuhchhuahte kha a huam tel vek thung a ni. A then chu Jerusalem chhim-chhak lam Wadi Murabba‘at ah te, Wadi Hever ah te, En-gedi chhim lamah te leh A.D. 73 a Rome ho ina Judah kulh an tihchhiat tak Masada ah te a ni hlawm.
Puk hmasa ber bulhnaia awm Khirbet Qumran chu chhe tawh tak ni mah se luhchhuah a han nih chuan hmanlai Juda sakhaw la run/peng hrang pawlte lo khawsak tawhna a ni tih hriat chhuah niin, an pawl mi leh sate chu lehkha-zial hmuhchhuah tak neitu te a ni ni tihte an hre chho leh ta zel a. Heng pawl intihrangte hi puk hrang hranga khawsa ni hlawm mahse Khirbet Qumran hmunah chuan cho te eiin, serh leh sang thilte leh Pathian biaknate an nei thin bawk a ni.
Qumran chu Rome leh Juda leh indona hmasa ber (A.D. 66-73) khan tihchhiat niin, an pawl mi leh sa tam takte chu boral in, an pawl pawh chu a lo kehchhe ve ta nia rin a ni a. Beih an tawk dawn a ni tih hriaa lo inralringin an lehkha zial tam takte chu pukah chuan an lo thukru hman a. Ron ngaihsak zui turin a neitute chu an ron let leh tawh ngai lo a ni.
Lehkha zial te chu kuta ziah vekte an niin, an zia leh kalhmang a inang lo hlawm hle mai a. Puk hmasaberah chuan zawlnei Isaia lehkha zial, a kim pakhat leh a kim lo pahkhat, Habakkuk bu hrilhfiahna thenkhat te, Genesis lehkha zial them te, Deuteronomy, Roreltute leh Daniela te lehkha zial, a vaia Babulon atanga an let leh hnu Hebrai tawnga ziah leh, Leviticus zial them thenkhat, Babulon sala an tan hma Hebrai tawnga ziahte an ni a. Puk dangah chuan Sam, Samuela leh Leviticus te hmuhchhuah an ni. Bible a Thuthlung Hlui bu zawng zawng, Estheri bu tel loin pukahte chuan hmuhchhuah vek an ni. Hebrai tawnga ziah lehkha zial leh thler them dangte chu apocrypha (Bible bu dangte nena inmil lo) leh a ziaktu dik take hming emaw, tu emaw Bible a mi lar hming hawh chawpa ziahte an ni hlawm.
An hmuhchhuah hnu kum khat vel chhung chu a kum zat leh a tak tak leh tak tak loh thuah mithiamte zingah inhnialna a chhuak nasa hman hle bawk a. Mahse lehkha zial dangte pawh an hmuhchhuah chhunzawm chhohnate chuan an rinhlehnate chu a rawn ti dai ta a. Rinhlehna lian tak neitu tan pawh Dead Sea scroll hi tunlai emaw hun laihawl ami niloin hmasang ami a ni zawk tih a chiang hle awm e.
A tlangpuiin Qumran lehkhazialte hi kum B.C zabi 3-na leh A.D zabi 1-na inkar vela mi nia pawm a ni a. Thuziak, hmun danga an hmuhchhuah hote kan tarlan takte kha chu kum A.D zabi 1 atanga 2-na inkar ami a nih rin a ni.
Dead Sea scrolls hian eng ang Bible nge Isua hunlai khan an hman thin tih zawhna chu min chhang ta bawk a ni.
Comments
No comments yet
Be the first to start the conversation.