#33 Tattoo chungchang engtin nge Bible-in a sawi?
Channa: Khawvel hmun hrang hrangah Tattoo hi a lar chak hle mai a. Tun hnaiah mihring te’n Tattoo neih hi an intihhmuh nasa hle niin a lang. Mi awmherh leh mi tawrawt tak tak ni lem lo pawhin tattoo hi an uar hle a. Tattoo neih hi sual leh ṭha lo tak anga kan ngaih ṭhin pawh a reh chho tial tial a nih hmel.
Isua Krista hnungzuitute hian Tattoo kan neih ve a thiang em? Tattoo hi Thu Thlungtharah hian sawilan engmah a awm lo a. Chuvangin, tattoo neih hi sual a ni kan ti ngawt theih lovang. Bible in a sawilan tel loh avang hian midangin an taksaa tattoo an chhu kai a nih pawhin ngaih dan siam nghal ngawt a, han dem ngawt hi a fuh ber lo maithei.
Chutihrualin, tattoo chungchanga Bible in thurawn min pek hrang hrang te han zir chiang ila ṭha awm e. Naupangte chuan an nu leh Pa thu awiha chawimawi tura tih an ni (Ephesi 6:1–2). Kumtling lote’n tattoo an neih hian an nu leh pate’n an pawmpui lo ang tih a hriat theih a, chuvangin Bible hian a dodal tlat a. Thuawih lohna avanga tattoo an neih chuan chu chu sual a ni.
Kristian te chuan “Pawn lam incheina” ai chuan “chhunglam incheina” kan ngai pawimawh zawk tur a ni (1 Petera 3:3–4). Lar chak leh mi hîp tum avanga tattoo neih chu chapo vang a ni ang a. Mahni sualna tilang chiangtu a ni ang.
Pathian chuan kan thinlung hi a hmu tlang vek a kan thiltih engkim hi Pathian ropui nana ti turin min duh a ni (1 Korinth 10:31). Midang laka tlak tlum duh vang emaw chungnung bik nih duh vanga tattoo kan nei a nih bawk chuan Pathian ropuina tur a ni thei lo. Tattoo hi amah chuan sual a ni kher lo thei, mahse kan neih duh chhan a zirin sual a ni thei tihna a ni.
Kan taksa leh thlarau hi Pathianin min tlan tawh a, Pathian ta kan ni. Ringtu taksa chu Thlarau Thianghlim temple a ni bawk. (1 Korinth 6:19–20). Engtianga tih danglamin nge Thlarau Thianghlim nen inmil deuh ber ang? Kan tih loh tur chin bituk sak kan ni thei ang em?
Miin a taksaah tattoo a chhut hnem lutuk hian mihring themthiam danglamna lantirna aiin sual lam rawng kaina hun a thleng thei mai ang em?
Krista palai, khawlvel hnena Pathian thuchhah puangdarhtu tur te kan ni a (2 Korinth 5:20). Tattoo hian engtiang kawngin nge hna a thawh ve ang? Kan rawngbawlna kawngah hian min puih aiin kan kawng min daltir zawk mai ang em? Rinna tel lova tih chu chu sual a ni a (Rom 14:23), miin tattoo nei a duh a nih chuan Pathianin a phal ngei a nih tih hriatna chiang tak nei rawh se.
Thuthlung Hluiah chuan tattoo chhut phallohna dan hi a lo awm ngei mai:
Mitthi avangin in taksa in zai tur a ni lova, in intial tur a ni hek lo (Leviticus 19:28). Helai chang hian engvangin nge tattoo hi phal a nih loh chhan chiang takin a sawi lem lova. Mahse tattoo chhut hi milem biakna leh puithuna âtthlâk vanga lo awm a ni ang tih rin theih.
Ringlo mite chuan an pathian te chibai bukna leh chhinchhiahna atan an hmang a ni mai thei a. Pathian chuan A mite chu danglam turin a duh a. He lai changah tho hian “Kei hi Lalpa chu ka ni” tiin a sawi a ni.
Israel fate kha Pathian ta an ni a, a kutchhuak, a vohbikte an ni a, milem pathiante chhinchhiahna ang kha an pu ve tur a ni lo.
Thuthlung Thara ringtute chu vohbik nihna dan hian huam ve tawh lo mahse, helai aṭanga kan zir chhuah theih chu Kristian te’n tattoo hi neih an duh a nih chuan puithuna âtthlâk vang emaw khawvel thil sawimawina leh chawi lar duh vang a ni tur a ni lo.
Kan thu kharna atan chuan tattoo hi a mah ngawt chuan sual a ni lova. Kristiante tan pawh kan mimal zalenna ni mahse Bible in thu min rawn ang zel leh Pathian kan hmangaih vanga kan tih ni zel rawh se.