Thenkhat chuan vanram kan kal hunah chuan tumah kan inhre tawh dawn lo, inkhawmpui tiak tawh ngai lo tiin nupa pa awm tawh lovin, unau nau awm tawh lovin kan awm tawh dawn an ti a. Chung chu Bible zirtir dan a ni reng em? Vanram hian kan la inhre thei dawn nge dawn lo tih tun hunah hian kan zir chiang dawn a ni. Kan innghahna tur chu Bible a ni.
1 Korinth 15:51-53-ah chuan tirhkoh Paula chuan tihian a sawi a:
“Ngai teh u, thuruk ka hrilh dawn che u hi: Kan zain kan muhil kher lo vang a, nimahsela kan zain tawtawrawt hnuhnung ber rik hunah chuan rei lo teah, mit khap kar lovah tihdanglamin kan awm vek tawh ang; tawtawrawt chu a ri dawn si a, chutichuan mitthite chu tawih thei lova kaihthawhin an awm ang a, keini pawh tihdanglamin kan awm tawh ang. He tawih thei hian tawih theih lohna a sin tur a ni a, he thi thei pawh hian thih theih lohna a sin bawk tur a ni.”- 1 Korinth 15:51-53
He Bible changah hian tawih thei lova kaih thawh kan nih tur thu a inziak a. Isua lo kal leh hunah chuan Lalpan a mite chu a kaitho leh dawn a ni. Entir nan, Martha-i unaupa Lazara a thih khan, ni lai a liam tawh a, Lazara chu Martha-i chuan a uih tawh ang a ti a nih kha (Johana 11:39). A uih a rin chhan chu a tawih chhiat tawh a rin vang a ni. Mahse, Isuan a kai tho leh a. Mary leh Martha-i khan an unaupa Lazara kha an hai lem lo a, an unaupa ngei a ni tih an hria a nih kha. Chuitiang chuan, Lalpan nikin niah min la kai tho ngei ang a, keini pawh eng vangin nge kan inhriat loh bik ang le?
Isua Thawhlehna Kha!
Thuthlung Thar hian kan thawh leh hunah rau reih ruaiin kan tho dawn lo va, taksa khawih theih ngei neiin kan tho leh dawn tih min zirtir a ni. Isua kha thihna ata a rawn thawhleh hnu kha a zirtirte hnenah a inlar a, a zirtirte khan “thla” emaw an ti a nih kha. A inziak ang takin chhiar ta ila:
Nimahsela rapthlak an ti em em a, an hlau va, thlarau hmu-ah an inruat a. Tin, ani chuan an hnenah, “Engati nge in mangan? Engah nge in rilruah rinhlelhna a lo awm? Ka kutte, ka kephahte hi en rwh u, hei keimah ngei kha ka nih hi! Mi dek ula, en rawh u; mi hmuh ang hian thlarauvin tisa leh ruh a nei lo ve,” a ti a. (Luka 24:37-39).
Chutianga a sawi zawh chuan, a kete a kut te a entir a tih kan hmu a, mahse an lawm luat tukah an la ring lo cheu a, a ti a nih chu! Kan Bible chuan. A inziak dan tak lo chhiar leh teh ang:
Tin, an lawm luattuk avanga an la awih loh cheuva mak an tih chhungin an hnenah, “Hetah englo ei tur in nei em?” a ti a. Tin, sangha rawh hrang khat an pe a. Tin, a la a, an hmaah chuan a ei ta a.- (Luka 24:41-43).
Isua hian khawih theih taksa chu a nei tih Bible-in chiang mang khenin a sawi a.
Thoma khan a la hmu ve lo a ni awm a, Thoma an hmuh veleh a hnenah zirtirte chuan, “Lalpa chu kan hmu ta!” an ti a (Johana 20:25). Hei hi a pawimawh a, “Lalpa chu kan hmu ta” an tih hian Isua tho leh taksa chu Isua a ni ngei tih an hria a ni.
Mahse, Thoma chuan a ring lova a sawi dan takin lo chhiar ta ila:
A kuta thir khenna serte kha ka hmuh a, thir khenna serahte chuan ka kutzung ka khawih luh a, a naka ka zen meuh loh chuan ka ring lo vang,” a ti a.- (Johana 20:25).
Chuvangin Isua chu an hnenah a ni riat ni-ah a rawn inlar leh a. Isuan Thoma hnenah chuan, “I kutzungin han khawih la, ka kutte en rawh; i kut han ban la, ka nakah zen rawh; ring lovin awm suh la, ring rawh,” a ti a. (Johana 20:27).
Thoma chuan a nak a zen hnuah chuan a ring ta a, “Ka Lalpa leh ka Pathian i ni,” a ti ta a nih kha.
Tin, -ah chuan kan thawhlehna taksa chu Isua taksa ang chiah a nih tur thu min hrilh a, i lo chhiar teh ang:
Keini zawng van khua leh tui kan ni si a, van atanga min chhandamtu Lal Isua Krista lo kal tur chu nghakhlel takin ka thlir a ni. Ani chuan a thawhin, engkim pawh ama thu thuin a awmtir thei, chu mi thawhzia ang zelin kan tlawm lai taksa hi, ama taksa ropui anga awm turin a siam tha leh ang.- Philippi 3:20, 21
Kan sawi tak kha han khai khawm ta ila: Thawhlehna kan chan hunah chuan thihtheihlohna leh tawihtheihlohna kan nei ang a. Kan taksa chu Isua thawhlehna taksa ang: hriat theih, hmuh theih, khawih theih a ni ang. A zirtirten tho leh Isua an hria a, amah a ni tih an hriat theih ang chiah khan keini pawhin kan unaute pawh thawhlehna a thlen hunah kan la hre dawn tih a chiang ta a ni.
Tin, Isua thawhruala lo tho an awm thu Matthaia kha a record a, lo chhiar leh lawk teh ang:
Thlante a lo inhawng a; mi thianghlim muhil tawhte taksa tam tak pawh kaihthawhin an awm ta a; chungte chu a thawhleh hnuah chuan thlan ata lo chhuakin khaw thianghlimah chuan an lut a, mi tam tak hnenah an inlar ta a.- (Matthaia 27: 52, 53).
Heng mi thianghlim lo tho lehte hi khaw thianghlim Jerusalem-ah chuan mi tam takte hnenah an inlan tih tarlan a ni a. Taksa neiin an rawn tho leh tih a chiang lehzual a ni. Amaherawh chu van taksa neiin an tho a ni.
Finfiahna dang kan hmuh theih chu hmel danglamna tlanga lo chhuk thla Mosia leh Elija chungchang kha a ni. Mosia leh Elija kha vanrama awm tawh an ni a, anni kha hriat theih vek an la ni a, anmahni ngei an ni tih hriain Matthaia pawhin “Mosia leh Elija” an ni tiin a chhinchhiah kalh a ni (Matthaia 17:3-4).
Chuvangin, vanramah pawh nihna hrang theuh kan la nei ang a, kan la inhre theuh dawn a ni. Van taksa kan chan hunah chuan, putarte pawh an hmel zurte chu a lo reh leh ang a, tleirawl hmel an lo put leh avangin kan inhai deuh mai thei a, mahse, kan tawngdan phung, kan kal dan, kan chet danah te kan inhre hrang dawn tho niawmin a lang a ni.
Vanrama kan kal hunah chuan tumah kan inhre tawh dawn lo ti-a zirtirna hi zirtirna dik lo a ni a. Kan la inhre vek zawk dawn a ni. Kan inhriat loh chuan robot ang mai kan lo ni ang a, chhandam kan nih man pawh a awm teh chiam dawn lo bawk a ni.
Chutianga hriatna nei loa kan awm ai chuan, Pathianin a tira sual kan tluk tirh khan min tiboral vek thei a, keimahni ang a thar hlak pawh a siam leh thei a ni. Mahse, chutiangin a ti lo va, min ngai hlu a, kan tan a lo thi hial a ni. Nangmah ngei kha a duh che. Vanah pawh i nihna leh i nungchang kha a bo dawn lo. Van taksa neiin i awm tawh zawk dawn tihna a ni. Khati zawng kha ni mai se, Lalpan malsawm che u rawh se.