#13 Khawvel hun hnuhnungah kan cheng mek em?

Khawvel hun hnuhnungah kan cheng mek em?

Ringlo mite (Non-Christian) chuan khawvel hun hnuhnungah kan cheng tawh tih hi rin harsa an ti a.

Bible-in engtin nge a sawi? 

2 Peter 3:3-4: “Hei hi hre hmasa ula, ni hnuhnungahte chuan nuihsantute chu an mahni chakna anga awmin, nuihsan chungin an lo kal ang a, ‘A lo kal lehna thuthiam chu khawiah nge? Siam tirh atangin engkim a awm pangngai angin chi thlahtute muthilh ni ata tawh kha a la awm zel a lawm,’ an la ti ang.”

Hun hnuhnung chhinchhiahna pakhat chu Isua Krista dodaltu (Anti-Christ) lo lan hun hi a ni  

1 Johana 2:18:  “Naute u, hun hnuhnung ber chu a ni ta e, Krista dodaltu a lo kal ang tih inhriat ang khan, tunah pawh Krista dodaltu tam tak an lo chhuak ta; chu vang chuan hun hnuhnung ber a ni ta tih kan hria e.”

Isua Krista hian khawvel tawpna hun lo thlen tur thu hi a sawi lawk em?

Matthaia 24:14: “Tin, he ram chanchin tha hi hnam zawng zawng hriattirna turin khawvel zawng zawngah hrilin a zawm ang a; chumi zawhah chuan tawpna chu a lo thleng ang.”

Hun hnuhnungah chuan mipui tamtak bum turin Krista derte an lo chhuak ang.

Matthaia 24:23-24: “Chutih hunah chuan tu pawhin in hnenah, ‘En teh, Krista chu heta hi a awm,’ emaw ‘Heta hi’ emaw, an tih chuan awih suh ang che u. Krista derte leh zawlnei derte an lo chhuak dawn si a, chung chuan theih ang sela, thlante meuh pawh an tihder theih nan chhinchhiahna leh thil mak ropui takte an ti ang.”

Ni, thla leh arsi ah te chhinchhiahna kan hmu ang.

Matthaia 24:29-30: “Nimahsela, chung ni hrehawm hnu lawkah chuan ni tihthimin a awm ang a, thla a eng tawh lo vang a, van atangin arsite a lo tla ang a, van thiltihtheihnate chu tih nghin a ni ang; chutih hunah chuan Mihring Fapa chhinchhiahna chu vanah a lang ang. Chumi hunah chuan leia chi tinin an awmte an inchum ang a, Mihring Fapa hi thiltihtheihna leh ropuina nasa tak nen, van chum chunga lo kal an hmu ang.”

Hun hnuhnungah chuan khawvel mihringte nungchang hi eng angin nge a awm dawn?

2 Timothea 3:1-5: “Tin, hei hi hre rawh, ni hnuhnungahte chuan hun khirh takte a lo awm ang. 2Mi, mahni inhmangaihtu te, tangka ngainatu te, intivei te, chapo te, Pathian sawichhetu te, nu leh pa thu awih lo te, lawm na chang hre lo te, thianghlim lo te, 3hmangaihna pianpui nei lo te, huaikawm bawl te, hektu te, insum thei lo te, mi kawlhsen te, tha duh hauh lo te, 4vervek te, thuhnu dawn lo te, inngaihlu te, Pathian hmangaih aia mahni lawmna mai hmangaih zawktu te an ni dawn si; Pathian ngaihsak anna an nei ang a;nimahsela, a thiltihtheihna chu an awih lo vang; chung ang chu hawisan rawh.”

Hun hnuhnungah chuan hriatnate a pung dawn.

Daniela 12:4 : “Mahse, nang aw Daniel, thu chu thup la, lehkhabu chu char tlat rawh, tawpna hun thlengin; mi tam tak an tlan vel ang a, hriatnate a pung dawn a ni,’ a ti a.”

Hun hnuhnung chinchhiahna dang Bible in engnge a tarlan?

Luka 21:25-26: “Tin, niah te, thlaah te, arsiah te chhinchhiahna a awm ang a; tuifinriat rum leh a fawn avangin, leiah pawh hnam tin hrehawmna leh manganna a thleng ang; 26 thlabar avang leh khawvel a thil lo thleng tur chu ngaihtuah avangin mite an thidang ang; van thiltihtheihna te chu a nghing dawn si a.”

Hun hnuhnungah chuan muanna leh himna thu an sawi uar hle ang.

1 Thessalonika 5:2-3: “Lalpa ni chu zanah, rukru angin a lo thleng dawn tih nangmahni ngeiin chiang takin in hre si a. ‘Muanna leh himna,’ tia an sawi lai takin, hmeichhe nau vei angina, chawplehchilha boralna an chungah a thleng ang a, an pumpelh tawp lo vang.”

Heng chhinchhiahna te kan hmuh hunah chuan engtin nge kan lo hmachhawn ang?

Matthaia 24:42-44: “Chutichuan, ngaihven rawh u, eng niah nge in Lalpa a lo kal dawn in hre si lo. Nimahsela, hei hi hre rawh u, rukru a lo kal hun tur in neituin hria sela, a veng ang a, a in a reh pawh tir lo vang. Chuvangin, nangni pawh inring rengin awm rawh u, in rin loh hunah Mihring Fapa a lo kal dawn si a.”

 Isua Krista hi engtikah nge a lo kal leh dawn?

          Isua hi a lo kal tep tawh a. A zirtirte hnenah pawh khan a lo kal leh tur thu a sawi a ni.

Johana 14:1-3: “In thinlung mangang suh se; Pathian in ring e, Kei pawh mi ring ve rawh u. 2ka Pa inah awmna tam tak a awm a, a awm loh chuan Ka hrilh tawh tur che u a ni; in tan hmun siamin ka kal dawn hi. 3Tin, in tan hmun Ka han siam chuan, Ka lo kir leh ang a, Ka hnenah ka la ang che u; Ka awmnaah nangni pawh in awm theih nan.”

 Isua hi engtikah nge a lo kal leh dawn?

            A lo kal tep tawh a. Mahse tu mahin a lo kal hun tur hi an hre lo.

Marka 13:32: “Nimahsela, chumi ni leh a dar thu chu Pa chauh lo chuan tu man, vana vantirhkohte pawhin, Fapa pawhin an hre lo.”

Isua vana a lawn hma lawk khan A zirtirte pawh khan a lo kal leh hun tur hi an zawt a. A hun leh ni te chu Pa thuneihna a nih a vangin mihring hriat ve chi a nih loh thu a sawi a ni. Chu vangin, Isua hi naktukah emaw, thla tharah emaw, nakumah emaw, kum za a liam hnu ah pawh a lo kal thei a. Nang leh kei a tan hian chu chu enge a awmzia ni ta ang le? Isua nghaktute chu in ring rengin kan lo awm tur a ni. Sual Setana hian Isua lo kalna ni a hnaih tawhzia leh a chhinchhiahnate hrethiam lo tur hian mi tam tak bum a tum reng avangin inbuatsaih leh Isua thlir reng chung a kan hun kan hman a pawimawh hle a ni.

Ngati nge Isua hi a lo kal har em em na chhan?

            Isua Krista hi lo kal thei reng a ni a. Mahse mi tam tak la in peih lo leh in buatsaih lo an la awm a vangin, A mah an hmuh ve theih nan hun a la pe hram hram zawk a. An sualte an sim theih nan leh vana a hruai chhoh ve theih nan a la nghak reng a ni.

2 Petera 3:8-9: “Nimahsela, duh takte u, he thu kam khat hi theihnghilh suh u, Lalpa ngaih chuan ni khat hi kum sangkhat ang a ni a, kum sangkhat pawh hi ni khat ang a ni, tih hi. Mi thenkhatin muanga an ruat angina Lalpa chu a thutiam kawngah chuan a muang lo ve; tu ma boral duh lova, mi zawng zawng lo sim duhin, nangmahni lamah a dawhthei a ni zawk e.”

Isua Krista lo kal lehna chungchang a vau lawkna.

          Isua lo kal lehna chungchangah hian thurin leh rin dan mak tak tak, Bible zirtirna ni si lo, mi tam tak rilru chawk buai tu a tam hle mai a. Thlan bik mi tlemte te hnenah thalrauvin a rawn in lar dawn em? Hmun pakhat chauh ah a rawn kal dawn em? Isua hi thlalerah a rawn inlar dawn em? Hun hnuhnungah chuan zirtirna dik lo hmanga bumna a thlen nasat dawn avangin Isua khan hetiang ang thu dik lo chungchang a vau lawkna/hriattirna a lo sawi lawk a nih kha.

Matthaia 24:4-5: “Tin, Isuan a chhang a, an hnenah, ‘Tuman an tihder loh nan che u fimkhur rawh u. 5Mi tam tak, ‘Krista chu ka ni,’ tiin keima hming chhalin an lo kal ang a, mi tam tak an tihder dawn si a” Heng bumna laka kan in venna tha ber chu Bible chauh hi a ni dawn.

Isua hi a rukin a rawn kal dawn em?

          Mi tam tak zawhna chu, Isua lo kal hunah chuan mi engzatin nge hmu ang? Tih hi a ni. Krista chu eng ropui tak, ring tak leh ropui takin a lo kal dawn a ni. A rukin a rawn kal dawn lova, khawvel mihring zawng zawngin an hmu vek dawn a ni.

Thupuan 1:7: “Ngai teh u, chhumte nen a lo kal dawn e; mit tinrengin an hmu ang a, a chhuntute ngei pawh khan; khawvel a hnam zawng zawngin amah an tah bawk ang. a ni, Amen.”

            Mihring pakhat te pawh Isua lo kal lehna hmu lo an awm dawn lo tih a chiang hle a ni. Amah Isua ngeiin a lo kal hun tur chungchang a sawi.

Matthaia 24:27,30,31: “27Kawl, chhak lamah a lo phe chhuak a, thlang lam thleng pawhin a lang thin a, Mihring Fapa lo kal lehna chu chutiang chu a ni dawn si a, chutih hunah chuan Mihring Fapa chhinchhiahna chu vanah a lang ang. Tin, a vantirhkohte chu, tawtawrawt ri nasa tak nen a tirchhuak ang. anni chuan a thlante chu kawlkil li ata – van tawp atanga a tawp lehlam thlengin an lawrkhawm ang”

Isua Krista lo kal lehna kan nghah chhung hian eng tianga lo nung tur nge kan nih?

          Kristiante chuan in ralring leh tawngtai reng chungin an lo nghak tur a ni.

Luka 21:34-36 : “Amaherawhchu, fimkhur rawh u; chuti lo chuan, ei puar lutuk nen, zu ruih nen, dam chhung khawsak ngaihtuah nen, in rilru a khat lutuk hlauh ang a, chumi ni chuan thang awk angina thawklehkhatan in chungah a lo thleng phut ang. Chutiang tak chuan lei chung zawng zawnga awmte chungah chuan a thleng theuh dawn a ni. Chutichuan, chung thil lo thleng tur zawng zawng chu  pumpelh tlakah leh Mihring Fapa hmaa ding tlaka ruat in nih theihna turin, eng lai pawhin tawngtai chungin ngaihven rawh u, a ti a”

Isua hi engtin nge a lo kal dawn?

            Isua vana a chhoh lai an hmuh ang bawk khan a ngial a ngan in a rawn kal leh dawn a ni.

Tirhkohte 1:9-11: “Tin, chung thu chu a sawi zawhin an hmuh reng chungin vana hruai chhohvin a awm a; tin, chhumin an hmuh phak lovah a hruai bo ta a. Tin, a chhoh laia van lam an en reng lain mi pahnih, puan var sinin an kiangah an lo ding a; chu mite chuan, ‘Galili rama mite chu, engati nge van lam en a in din reng? He Isua in hnen ata vana hruai chhohva awm hi, vana a chho inhmu ang bawk hian Amah ngei hi a lo kal leh ang,’ an ti a.”

Vantirhkohten Isua an rawn zui ve dawn em?

          Bible in a sawi dan chuan vantirhkohte chu tawtawrawt ri nen an lo kal ang a, Kristaa thi tawhte chu an rawn lawr khawm ang (Matthaia 16:27; 24:31; 25:31).

Isua lo kal hunah chuan Pathian mite chu engtin nge an awm dawn?

          Kristaa thi tawhte chu an tho leh ang a, ringtu nungdama lo la awmte nen vana lak chhohvin an awm ang.

1 Thessalonika 4:16-17 : “Lalpa ngei chu authawm nen, vantirhkoh chungnung ber aw nen, Pathian tawtawrawt ri nen, van a tangin a lo chhuk dawn si a; tin, Kristaa thi tawhte chu an tho hmasa ang a; chumi hnuah chuan keini nunga lo la awm rengate hi, boruakah Lalpa hmuak turin, anmahni rualin chum zingahte khian lak chhohvin kan awm ang; chutichuan, kumkhuain lalpa hnenah kan awm tawh ang.”

Misuaksualte tih boral an ni dawn em?

          Isua lo kal hunah chuan misualte chuan Krista hmel eng ropui tak an hmuh ngam loh avangin lungpui leh tlangte chu an mahni delh hlum turin an la ngen ang (Thupuan 6:15-17). Misualte chuan Pathian an hriat duh loh avang leh Isua Krista an pawm loh avangin tih boralin an awm ang (2 Thessalonika 1:7-10).

Pathian miten engtikah nge thi thei lo taksa kan neih ang?

            Isua lo kal hunah chuan tawtawrawt hnuhnung ber a ri ang a, kan lei taksa hi thi thei tawh lo tura tih danglamin a lo awm tawh ang.

1 Korinth 15:52-53: “kan zain tawtawrawt hnuhnung ber rik hunah chuan rei lo teah, mitkhap kar lovah tihdanglamin kan awm vek taw hang…mitthite chu tawih thei lova kaih thawhin an awm ang a. He tawih thei hian tawih theih lohna a sin tur a ni a, he thi thei pawh hian thih theih lohna a sin bawk tur a ni.” 

Ngati nge Isua hi a lo kal leh dawn?

          Bible in a sawi dan chuan Isua chu he khawvela amah ringtute lawman pe turin leh mi tam tak vanrama hruai chhoh turin a lo kal leh dawn (Thupuan 22:12).

Matthaia 25:34: “Chumi hunah chuan Lalber chuan a ding lama mite hnenah chuan, ‘Ka Pa voh bikte u, lo kal ula, khawvel siam tan tirh ata in tana ram buatsaih chu chang rawh u.’”

            Eng dang zawng aiin, Isua hian nangmah nen a hun hman a chak a. Vanramah, mittui leh natna awm tawh lohna hmuna hruai ve che a duh a, a sawm reng che a ni. Hetiang ang sawmna duhawm tak lak ata engin nge dang thei ang che? I nunah Isua aia pawimawh hmasa zawk a awm thei dawn em ni? He thu aia pawimawh zawk a awm dawn em ni, “Isua nungchang ang neih a, a hnen a chatuana awm i duh em?

Ngati nge Isua hi a lo kal har em em na chhan?

            Isua Krista hi lo kal thei reng a ni a. Mahse mi tam tak la inpeih lo leh inbuatsaih lo an la awm a vangin, Amah an hmuh ve theih nan hun a la pe hram hram zawk a. An sualte an sim theih nan leh vana a hruai chhoh ve theih nan a la nghak reng a ni.

2 Petera 3:8-9: “Nimahsela, duh takte u, he thu kam khat hi theihnghilh suh u, Lalpa ngaih chuan ni khat hi kum sangkhat ang a ni a, kum sangkhat pawh hi ni khat ang a ni, tih hi. Mi thenkhatin muanga an ruat angina Lalpa chu a thutiam kawngah chuan a muang lo ve; tu ma boral duh lova, mi zawng zawng lo sim duhin, nangmahni lamah a dawhthei a ni zawk e.”