#37 Los Angeles Kangmei Leh Ellen White-i Hrilhlawkna

Zawhna: Thil kan lo zawt che, Ellen White-i’n Los Angeles-a kangmei chhuak tur hi a hrilh lawk em ni, hei hi hmehbel theih a ni em?

Lalnuntluanga Ralte

Chhanna:

I zawhna chu zawhna pawimawh tak a ni. Ellen White-i thuziak chu rawn tar chhuak hmasa ta ila: Mizo tawnga “Ni Hnuhnunga Thil Thlengte,” ti-a kan lehlin “Last Day Events” ami kha a ni a, a sâp tawngin ka lo târ lang phawt ang a, chumi zawha a tul laite mizo tawngin ka lo dah leh dâwn nia. Last Day Events phek 113-ah chuan tihian a inziak:

“Scenes that would soon take place in Chicago and other large cities also passed before me. As wickedness increased and the protecting power of God was withdrawn there were destructive winds and tempests. Buildings were destroyed by fire and shaken down by earthquakes…A similar caution was given in regard to building in Los Angeles. Repeatedly I have been instructed that we must not invest means in the erection of expensive buildings in cities.”

Mizo tawngin kan dah leh ang e:

“Chicago leh khawpui lian danga thil lo thleng mai tûrte chu hmuhtîr ka ni a. Sualna chu a lo sosân zêl avâng leh Pathian thiltihtheihna pawh chuan a kiansan tâk avângin thli chhia a rawn tleh a. In ropui tak takte chu meiin kâng chhiain, a kâng bângte chu lîngnghîng na takin a sâwi chim leh ta vek bawk a… Hemi hnu rei vak lohah Chicago khawpuia in ropui tak takte leh an sak dân tûr ruangam an duan te bâkah, tichhiat vek an nih dân te chu kan mite tâna zirlai pawimawh tak a ni tih hmuhtîr ka ni a. Los Angeles-a in chungchangah pawh hetiang tho hian fîmkhur thu pêk a ni. Khawpuiahte chuan in man to tak takte sak nân sum kan sêng tûr a ni lo tiin vawi tam tak hriattîr ka ni.”

Mizo tawngah hian Los Angeles chungchang hi an leh hmaih a nih ka ring a, a awm ve lo a. Engpawhnise, he thuziak hi kum 1906-a tu emaw hnêna Pi White-i’n lehkha a thawn atanga lâk chhawn a ni a, a thuziak pum pui chu The Paulson Collection of Ellen G. White Letters phêk 50-naah a awm a. A lehkhathawna an thu khel ber chu Chigaco-a in lian leh man to sak leh sak loh tûr thû chu a ni.Medical missionary hna an thawh duh avângin rawngbawltute chu Chigaco-ah in man to leh lian tak mai lei an tum a, Pi White-i chuan khawpui lian leh Pathian hriat lohna hmun Chicago-ah khan inbenbel a phal lo a, a hnuah in man tlâwm leh temporary zâwk an sa ta bawk nghe nghe.

Tichuan, in man to sak chungchângah hian Pi White-i chuan “Los Angeles” pawh a sawi tel a, “Los Angeles” a kan tûr thu a ziahna a ni lêm lo a, Los Angeles-ah in man to leh lian pui pui sak chu Lalpan a remti lo tih a sawi tumna a ang zâwk. Chutih rual chuan, Chicago leh khawpui lian dangte ti-a a sawi avangin, khawpui lian dangte hian Los Angeles pawh a huam ve thei tho bawk.“Last Day Events” bu-ah hian a thupui-ah “Chicago leh Los Angeles” tiin a indah a, hei hi “Last Day Events” bû khawr pumtutena thupui an belh a ni a, a lehkhathawn original-ah a awm lem lo a.

“Last Day Events” hi 1992 khân Ellen White Estate ten Pacific Press Publishing Association nên tanghoin an khâwr pum a ni. A awmzia chu “topical compilation” a ni a, Ellen White-i ngeiin-a a lehkhabu khâwr pum a ni lo (a thuziak dah khâwm chu ni tho mahse). Hetiang bû ho rêng rêng hi ngun leh zuala zir chian zêl a tul a, helaia “Los Angeles” tih thupuia an telh avâng hian, Los Angeles kangmei chungchâng ziahna emaw tih a awl nghâl hle a, mahse han chhiar chiang la, chutiang a nih lohna chu i hmu ang.

Los Angeles chu 'khawpui dangte" ti-a a sawi huangah chuan a tel thei a, mahse, Chicago chungchang hi a sawi ber chu a ni. Ellen White-i hian khawpui lianhote-a chhiatna a thlen ngun tawlh tawlh tur thu a sawi ni-ah ngai ta ila, Los Angeles-a kangmei pawh hi hmehbel chu rem ve tak a ni.

Lîrnghîng leh Kângmei: Chicago leh Los Angeles History

Engpawhnise, Chicago chungchânga a hrilhlâwkna a nih deuh zâwk avângin Chicago ram hi lo chhui hmasa ta mai mai ila, “In ropui tak takte chu meiin kâng chhiain, a kâng bângte chu lîngnghîng na takin a sâwi chim leh ta vek bawk a” tiin Chicago-a thil thleng tûr hrilhlâwkna chu kan hmu a.

A nih leh Chicago-ah hian hetiang hi a thleng tawh rêng em? Chicago-ah hian tun kum 100 liam ta-ah khan lirnghîng emaw kangmei lian tham tak sawi tûr a awm tlat lo. Hê inlârna a hmuh kum hi 1906 a ni a, hemi hma daih kum 1871 daih tawhah khân “Great Chicago Fire” an tih kangmei nasa tak kha chu a awm ngei a, mi 300 vel tal chu an thi ni-a hriat a ni.

Mahse, hei hi chu inlârna a hmuh hma daih a ni bawk si a, sawi tel theih a ni lo. Chuvângin, hê inlârna hi hma lam huna mi tûr a la nih a rinawm.A nih leh, Los Angeles ve thung hi? Los Angeles-ah hi chuan lirnghîng leh kangmei a lo thleng nual tawh. Pakhat chu kum 1933, March 10-ah khân lîr a nghîng a, mi 120 vêl thi-in dollar million 40 man hu vêl thil a chhia a, tin, 1933 kum vêk, October 3-ah khân Griffin Park-ah kângmei a chhûak a. Khâ kangmei-ah khân mi 29 vêl thi-a ngaih a ni.

Tin, 1971-ah pawh lîrnghîng a awm leh a, mi 50 chuang an thi a. Tin, 1994, January 17-ah khân Northridge Earthquake an tih lîrnghîng khân Los Angeles hi a lo nuai tawh bawk a, mi 57 vêl an thi a, mi 9000 vêl an inhliam tiin Los Angeles Times chuan a lo record a ni (December 20, 1995). Tin, dollar billion 13-50 vêl hû in lo ram chu a chhia an ti bawk. [“1994 Quake Still Fresh in Los Angeles Minds” Los Angeles Daily News. January 11, 2014].

Ellen White-i’n Los Angeles chungchâng pawh lo sawi ta tehrêng sê (Chicago a sawina zâwk a ni tho nâ a), kângmei leh lîrnghîng hi a thleng nasa tawh êm êm a, tûn kuma mi kher hi hmeh bel a tul lêm lo a ni, kan hmeh bel dawn chuan a vaiin hian hmeh bel ila a fuh zawk ang. Bible-ah pawh lirte a nghing a nghing ang ti-a hrilhlawkna a awm ang deuh khan pawm chi a nih a rinawm.Chiang deuh-a kan sawi theih tâk chu, “Last Day Events” bu-ah hian Los Angeles kan tûr thû a inziak fak lo a.

Chicago chauh hi chiang taka inziak chu a ni a, Los Angeles-ah in man to sak loh tûr thû a inziak zâwk a ni tih hi fîmkhur deuha en chuan a pawmawm zawk a ni. Chicago leh khawpui dangah te chhiatna lo thleng tura a inziah avangin, tuna kangmei chhuahna (January 14, 2025) Los Angeles chauh hi kan hmehbel a rem lo a, a sawi ang hian "Chicago leh khawpui lian dangah  (Los Angeles tiamin)," chhiatna hi thleng rual chho hlawm tur niin a lang a, hrilhlawkna a nih avangin thil lo thleng leh zel danin thil a tichiang zual thei ang.

“Los Angeles ka sawina a ni lo," -Ellen White

Tin, hriatna tizau-ah ka sawi leh duh chu, Chicago inlârna chungchâng hi 1906-a a hmuh a ni a. Hemi kum vêk hian April 16-ah San Francisco lirnghîng tûr chu inlârnaah a [Pi White-i’n] hmu a, mahse, thenkhatin Los Angeles a sawi tel emaw an ti tâl(h) a ni awm e.

Tihian a diary-ah Los Angeles a sawi tel lohzia a târ lang:

“Since the San Francisco earthquake, many rumors have been current regarding statements I have made. Some have reported that while in Los Angeles, I claimed that I had predicted the San Francisco earthquake and fire, and that Los Angeles would be the next city to suffer. This is not true. The morning after the earthquake, I said no more than that ‘the earthquakes will come; the floods will come;’ and that the Lord's message to us is that we shall ‘not establish ourselves in the wicked cities.’” (Life Sketches on Ellen White, 411).

April ni 18-ah San Francisco-ah chuan lîr chu a nghîng ta ngei a, mahse thenkhat-in Los Angeles a sawi tel niin an sawi darh lui tal(h) a, ani chuan “chu chu a dik lo” tiin a lo sawi fiah a. Pathianin khawvêl chhiatna kaltlanga ro a rêl dân tûr tlângpui a sawina zâwk tih a sawi fiah nghâl bawk a ni. 1906 kum ami tho a nih avângin ka rawn târ lang a. Hetiang deuh hian “Last Days Events”-a thuziak hi kan la chhuak ve thei bawk a, mahse thutlûkna chu chhiartu kutah awm se la.

Tlângkawmna

A tlângpui chu kan zo ta-in ka hria. Tihian ka khaikhâwm duh; Pathian hian amah hawisantute chu leilung chhiatna hmangin a hrem thin tih hi thil dik a ni em? Bible kan en chuan Nova tuilêt te, Sodom leh Gomorra te, leh zawlneite chanchin tam tak kan hmu a. Pathian chuan chhiatnate hi misualte hrem nân a hmang ngei thin a, chu chu retributive judgment tiin theology-ah chuan kan sawi thin. Amah erawh chu chhiatna lo thleng zawng zawng hi Pathian hremna a nih lohzia chu Joba nun-ah khân a lang leh tho bawk a. Joba pawhin khua rêl chhiatna hlîr a paltlang a, Pathianin a hrem a ni chuang hauh lo, Setana hremna [Pathian phalsak] zâwk a ni a.

Chuvângin, khuarêl chhiatna hi misualte hremna nge a nih a, Joba anga mifelte chan mêk a nih tuman kan hre thei lo. Zawlneite erawh kha chuan an sawi thei, an duh emaw duh lo emaw, an hre lâwk thin tlat! Chutiang bawkin Ellen White-i pawhin a hre lâwk thin a, mi tithaihna ang deuha sawi a ni ngai hauh lo.

Mahse, zawlnei ni vê lo tân chuan, Pathianin chiang taka min hrilh a nih loh chuan, thutlûkna lo siam zung zung pawh thil dik a ni lo a ni. Chutih rualin, chhiatna lo thleng mêkte hian Pathian lamah min hîp thîn sê a tha a ni. Thenkhat intifing deuhho chuan chhiatna lo thleng tam tak pawh hrilh fiah zêl an lo tum a, “an awmna hi lîrnghîng kawng a nih vâng a ni” te an ti thin, lîrnghîng kawng a ni emaw, kangmei chhuah awlsamna hmun a ni emaw, thli tlehna hmun a ni emaw, khuarel chhiatna thlen awlsam theihna hmun a nihna tak pawh kha Pathianin a hmang thei a, chhiatna a thlen tîr thei a, Setana pawhin a hmang thei. Chuvângin, hemi thûah hi chuan ngawih hi rangkachak a ni zâwk mahin ka ring. Pathian leh a zawlneite chauhin eng tak nge a phênah thleng an hre thei a ni.