#60 Homosexuality hi Engtin Nge Bible-in A Sawi?

Khawvel hnam leh ram upa tak takte pawh hian hun kal tawhah khan neih inang inkawpna, mahni anpui kawpna ang chi hi an lo tawngin an lo hmelhriat daih tawh a. Chung zingah chuan- Greece, Rome, Egypt, China, Japan, Europe, Persia, America leh Africa te hi a langsar ber berte an ni.

Pathian chuan mipa leh hmeichhia chu danglamna nei, chu an pahnih inkawp chuan an nun tikim a, inpuibawm tawn tura siam an ni a (Gen.1:26-27). Pathian mitah chuan hmeichhia leh mipa chu tha leh mawi, intluk tlang tak a ni ve ve bawk (Gen.1:31; Johnana 10:30; 1 Cor.11:3). Chi thlah tura an duhna ti puitling turin an anpui lo ve ve duhna/itna a dah bawk a ni. Hmeichhia leh mipa chu nupa a insiamin, chu inneihna thianghlim, hmeichhiat mipatna in a tihbawlhhlawh loh chu Pathian ngaiha zahawm tak a ni bawk (Heb.13:4).

Bible-ah chuan kan anpui (mipa in mipa/hmeichhia in hmeichhia) kawp leh kawp duhna, itna leh duhnate chu Pathian in a demin a phal ngailo tih kan hmu (Gen.19:4-10; Juda 7, 8; levi.18:22; 20:13; Rom.1:26-28; 1 Tim.1:8-10).

Khawvel hmasawnna leh changkang chho zelah, thiamna hrang hrang atanga zirbingna, a bik takin biology, psychology leh sociology atang chuan mahni anpui kawp duhna/itna hi mihring chen hona (society) ah 5% atanga 10% an lo awm ve a nih pawhin thil pangngai leh an nihphung ve reng tur niin a ngai a. Damdawi lam zirna mit atang chuan homosexuality kan tih hi mihring pangngai ang niin, sualna leh awmherhna a ni tih chu an pawm thei lo a ni.

Pathian kohhran, Bible a innghat chuan mihringte zirna leh thiamna hmanga an hmuhchhuahte chu a pawnga takin a hnawl fithla thak bik lo a. Mahse, a inghahna zawk chu Pathian leh a zirtirna (Bible) ah a ni ber zawk a ni.

Hetih mek lai hian, Bible ringtu inti ve thote zingah pawh mahni anpui kawp pawmpuina leh thlawpna, Bible tan chhana hmanga a dik ti pawh an awm ve ta nawk mai. Pathianin hmeichhia leh mipa inhmangaihte inkara inneihna a phal sak (an inhmangaihna behchhan in) ang bawkin, neih inangte pawh Pathianin phalna a pe ah an inngai a. Mahse, hmangaihna hi Pathian duh dan pela hrilhfiah a nih chuan a lo bawlhhlawh tawh thin.

An Bible chang rinchhan leh an hrihfiah dan chuan belhchian a dawl lo hle a. An chang lak chhuahte innghahna sawi tum leh awmzia dik tak hre mumal loa an hrihfiah vang a ni ve bawk.